[HAPPYSHARE_搵食重點] 少女情懷總是詩~一遊愛麗絲的秘密花園

6月 11, 2017

[HAPPYSHARE_搵食重點] 少女情懷總是詩~一遊愛麗絲的秘密花園

香港人咁大壓力，放咗工緊係要脫離現實，尋找吓兒時夢想嘅～就好似呢間Wonder Garden Cafe就係以「Alice in the Wonderland」為主題佈置成間cafe～無論裝飾、餐具定食物，全部都係同愛麗絲夢遊仙境個故事有關架，非常夢幻同可愛～

一上到去，就會見到一片森林，枱枱凳凳全部都有小動物陪坐，周圍仲有好多紙牌同花花，好似置身故事入面咁～

而呢度嘅餐牌頭幾版亦有講Wonder Garden 其實係愛麗絲第二次回到仙境時，為咗逃避紅心女王嘅追捕，同一班森林好朋友喺度聚餐所建立嘅秘密花園～食物更全部都有魔法架～

由於佈景實在太可愛，所以隊長B淨係影相都已經用咗半粒鐘～終於回過神來正正經經睇餐牌，立刻被佢嘅二人餐吸引到～事關都真係幾多嘢食，兩個前菜兩杯嘢飲兩個主食再加兩個甜品～仲要樣樣都咁靚，選擇困難嘅隊長B完全係棄械投降⋯

雖然認真講菜名同食物本身無咩關連，但全部菜式擺碟同材料都好colourful ，絕對有細心研究過～為大家介紹下啦，前菜有Follow the rabbit（跟着白兔先生）同Smile of Cheshire Cat（咧嘴貓的微笑）～前者係拉齊納多羽衣甘藍香橘沙律，正如餐牌特別註明，羽衣甘藍味道有少苦，但係好fresh同做starter 好適合，七彩繽紛的顏色令人見到已經開胃～後者則係紫薯牛角包，牛角包好鬆脆，淡淡的紫薯味不加糖，唔太甜更有種天然的感覺～包中間加入融開的棉花糖，完全是融化了女生的心～～

呢度上菜過程好好，逐樣逐樣黎，有充分的時間比隊長B嘆完兩個前菜先上飲品同主食～主食係The Looking-glass House（神秘鏡中屋）同The Duchess's Treasure Box（公爵夫人的寶盒）～前者係手作卡邦尼海鮮意大利麵，扁滑的意粉掛汁力極強，啖啖卡邦尼rich rich 的味道充滿口腔，即使配料不多，但卻令人好滿足；後者係野牛肝菌藍青口燴意大利飯，菇味好香濃，但跟意粉一樣配料相對少，不過隊員W清晒就知不錯吃啦！