[HAPPYSHARE_搵食重點] 超滋陰の金撈富貴老鴨湯 (內有血腥影片lol)

過得Element 睇戲，之前緊係要做足功課搵定附近有咩好西食～殊不知又比小女子搵到呢間金撈老鴨湯刺身火鍋專門店，啱晒同媽咪兩個名副其實嘅「鴨迷」～

打邊爐湯底很重要，呢點相信大家都好同意～而金撈富貴老鴨湯（$198/半隻）嘅湯底更係可以品嘗嘅角度慢慢飲～事關老鴨湯係傳統燉品，經秘製材料熬製兩小時後，燉出的鴨汁更善補五臟之陰和虛癆之熱，補血行水，養胃生津，清熱健脾⋯而湯底用上蘿蔔、蟲草花、素翅、杞子等珍貴食材，除了增強抵抗力，更可滋肺護肝降血壓，好處多多！

終於滾起來吧，店員第一時間幫我地切開鴨件同盛左滿滿一配湯～湯頭超鮮甜，雖然藥材味不太明顯，但的確好多素翅杞子同蟲草花，藥膳湯到口總覺得心裏很受寶～半隻鴨份量唔算多，但都有一定嘅肉可以食，配有泡椒醬，可以點黎食～泡椒醬唔辣，鴨亦唔酥，但一齊食可以去除多餘嘅酥味更可調出鴨鮮味～

呢度除咗火鍋仲有刺身同埋小食，都有唔少特色款，加上呢度有自己嘅魚缸，所以新鮮海產特別多～不過部份係以時價計算，大家叫之前可以先問店員～

等火鍋料熟時就食住小食等開餐啦！以薑蔥相伴嘅順德撈魚皮（$48），魚皮口感好爽，花生夠脆，食到有麻辣味，但鹹味不足，略嫌不夠惹味⋯

配料方面有鮮豬膶（$48）、新鮮鵝腸頭（$88）、雙拼蚌（$118）、神秘手打丸（$88/半份）、新鮮魚標（$88）、新鮮紫淮山（$58），本來仲想叫呢度嘅招牌特色蝦條，但係暫時缺貨，真係緣慳一面⋯

其實所有配料都幾好食，除左豬膶泵過水無晒豬膶味⋯大家慎選之外；雙拼蚌貴花拼象蚌，口感好爽，尤其貴花超級大塊，放落口完全有被包圍的感覺～鵝腸食得多，鵝腸頭唔知大家食過未，但原來比平時鵝腸更加回甘，雖然就咁睇好似好多油脂，但落湯灼完又唔覺得肥膩，反而更顯香味～

以為紫淮山會特別啲，但同原本白淮山相差不多，口感都係粉粉地咁，好處係吸晒湯中的精華～

如果大家中意食魚標（魚卜），呢度估佢唔到竟然有，不過煮嘅時候記得要篤爛佢先好放落湯，如果唔係煮到一爆開就彈到周圍都係⋯⋯

至於最重點嘅神秘四寶丸，未食之前雖然知道一定內有乾坤，但外表無甚特別，媽咪仲一直話失望⋯但實際上心存盼望係無錯架～因爲呢四寶各有千秋，雖然唔知隊長B有無食錯，分別有芝士墨魚丸 （食得出芝士香，手打過嘅口感超彈牙），蝦膏蝦丸（好香蝦味，有少少咸蝦味，蝦迷必愛），奶黃墨魚丸 （有啲似食緊奶黃包，雖未至於流心，但配埋彈彈的口感，很吸引喔）同埋黑松露魚丸（呢度其實食唔出係咩丸，只知好黑松露同惹味同好食）雖然認真講$88四粒丸的確係有啲貴，但神秘度十足，味道亦唔錯，就當噱頭嘢支持下啦！

----------------------
好味指數😋：7.5/10
翻啅指數🙆🏻：7/10
人均消費💰：201-400
服務態度👨🏼‍🍳：7/10
乾淨指數🌝：7/10
-----------------------------------------
金撈老鴨湯刺身火鍋專門店
佐敦文昌街25-47號文昌樓地下
----------------------
#hs火鍋#火鍋#hs廣東菜#hs佐敦#佐敦#食好西#美食#相機食先#食評#hs搵食重點#hs中產遊#老鴨#火鍋#邊爐#打邊爐#foodporn#foodreview#hkigfood#foodiehk#hongkongfood#hkfood#foodhk#hkblog#hkfoodblog#hkfoodblogger#hongkong#hk#852food#852foodie#Chinese#hotspot

❤為食時代_Happyshare每分精彩❤

 相傳上天賜予人類三大神《器》— 

視覺-見盡人間美好 聽覺-聽盡動人聲樂 味覺-嚐盡珍饈百味

「作為萬物之靈。小女子定當竭盡所能」 

❤️愛生活❤️愛健康❤️愛旅行❤️愛分享 

＊分享一切美食及生活瑣事＊ 

happyshare.moments@gmail.com 

歡迎各類合作及交流~ (試用 / 出席活動)

--

Follow Me

Facebook / Instagram