多年後再遇 仍令人心動的凡高廚房

對上一次黎係同隊員W剛剛拍拖無耐的時候，多年後的今日再重遊舊地~ 

呢度裝修唔同左，光猛左，多左好多打卡位，但依然不變的是呢度都係擺滿晒畫家大師梵高的作品，充滿藝術感

呢度D職員服務好好熱心，而且餐廳老闆都會每台同D食客傾下計了解下，聽到我地甘多年前去過佢都surprise 哈哈~

menu 好多野揀，有重磅餐亦有健康餐，心大心細真係諗左我地好耐先決定好叫咩 

我地一人叫左一個餐，再加個海鮮platter~個platter 好抵食，3百幾蚊有6隻蠔﹑蝦同青口！

生蠔好新鮮，事關隊長B係好怕食到蠔果種腥味，但呢度既蠔有海水味得黎又唔腥，忍不住食多左2隻哈哈！蝦同青口都新鮮，蝦肉彈牙，唔錯！

跟住就係食正餐的時候，呢度好似食法國大餐甘，你食完一樣佢先上第二樣，好講究 

先係前菜, 都有2款, 2樣都好味

一定要讚的是佢地個黑松露菇菇湯，未飲齋望都知佢地落足料，菇味極濃，而且混合左多種菇菇，飲到除左係忌廉滑溜的口感，更係果種層次感！ 

係眾多個餐中，隊長B最尾都係揀左皇牌推介的炭燒紐西蘭羊架餐，其實佢仲有一隻澳洲羊架餐，但原來職員介紹紐西蘭果款會酥D，甘隊長B緊係即刻落order 啦！

而隊員W就試西班牙帶子海鮮飯 海鮮飯很不錯，係帶微微硬身的飯粒，個sauce好夾，海鮮亦豐富 

但鍾意食羊既朋友，真係一定要試呢個羊架餐！火候掌握得極好，個羊架係全舊連埋後面大大舊肉果種，手起刀落切下去，ＷＯＷ！！ 是粉嫩的顏色！吃下去就是一隻字:嫩；第２隻字：滑；第３隻字：正！！帶有香濃羊味，真心推介！！ 

最尾食埋個甜品，個職員特別交帶落女士係食焦糖燉蛋，男士係食芝士蛋糕，不過其實２樣都好食呀，個芝士蛋糕咬下去就會食到濃爆芝士味，好creamy ; 燉蛋亦食到脆脆焦糖，作為結尾好滿足！